 |
| លោកគ្រូ ឡុង សារិន ។ រូបភាព៖ ហ្វេសប៊ុក សាស្ត្រាចារ្យ ឡុង សារិន |
លោកវិទូ | ថ្ងៃ ៤᧨៦ ឆ្នាំជូត ទោស័ក ព.ស. ២៥៦៣ | ២៩ មេសា ២០២០
លោកគ្រូ ឡុង សារិន បានចេញលិខិតសុំព្រះរាជទានទោសជាសាធារណៈហើយនៅថ្ងៃនេះ មិនយូរប៉ុន្មានក្រោយពីក្រសួងអប់រំចេញលិខិតសម្ដែងនូវការសោកស្ដាយ ។
លោកគ្រូ ឡុង សារិន ជាសាស្ត្រាចារ្យបង្រៀនមុខវិជ្ជាអក្សរសាស្ត្រខ្មែរ បានចេញលិខិតផ្ទាល់ខ្លួន ដើម្បីសូមព្រះរាជទានទោសពីសម្ដេចព្រះអគ្គមហាសង្ឃរាជាធីបតី និង សម្ដេចព្រះមហាសុមេធាធិបតី ទទួលកំហុសដែលគាត់ «បានពន្យល់អំពីអត្ថន័យប្រៀបធៀបរវាងព្រះសង្ឃគណៈមហានិកាយ និងព្រះសង្ឃគណៈធម្មយុត្តិកនិកាយ ក្នុងមេរៀនវិធីសាស្ត្រតែងសេចក្តី បានបណ្ដាលឲ្យប៉ះពាល់ និងភ័ន្តច្រឡំយ៉ាងធ្ងន់ធ្ងរចំពោះពុទ្ធសាសនិកជន និងមហាជនទូទៅ» ។
«ខ្ញុំព្រះករុណាសូមទទួលយកកំហុសនេះ និងសូមសំដែងការសោកស្ដាយយ៉ាងខ្លាំងចំពោះអ្វី ដែលបានកើតឡើងដោយអចេតនា និងសុំព្រះរាជទានទោសពីសំណាក់សម្ដេចព្រះមហាសង្ឃរាជ និង សម្ដេចព្រះសង្ឃនាយក នៃគណៈសង្ឃព្រះពុទ្ធសាសនាកម្ពុជា ។»
«ទូលព្រះបង្គំសូមសន្យាថា នឹងប្រុងប្រយ័ត្នខ្ពស់បំផុត ក្នុងការប្រើប្រាស់ពាក្យពេលបង្រៀន និងធ្វើការត្រួតពិនិត្យឲ្យបានត្រឹមត្រូវលើវីដេអូផ្សេងៗទៀត ទើបចាក់បញ្ចាំងជូនសិស្សានុសិស្ស និងសាធារណជន ។»
រាយការណ៍បន្ថែម៖
ក្រោយពីទទួលលិខិតសុំព្រះរាជទានទោសពីលោកគ្រូ ឡុង សារិន និងលិខិតដាច់ដោយឡែកមួយពីកម្មវិធីបង្រៀនតាមអនឡាញ E-School Cambodia ជាសាធារណៈ ទំព័រហ្វេសប៊ុក លេខាធិការដ្ឋានគណៈសង្ឃនាយក បានចេញសារទទួលយកការសុំព្រះរាជទានទោសនេះ និងសូមឲ្យព្រះសង្ឃ និងពុទ្ធបរិស័ទរក្សាភាពស្ងៀមស្ងាត់ ។
«សូមព្រះរាជាគណៈ ព្រះមន្រ្តីសង្ឃ ព្រះថេរានុត្ថេរៈគ្រប់ព្រះអង្គ និងប្រជាពុទ្ធបរិស័ទគ្រប់រូប ព្រះមេត្តា និងមេត្តាទទួលយក និងរក្សាភាពស្ងៀមស្ងាត់បញ្ចប់ការលេីកឡេីងពីបញ្ហានេះបន្តទៀត សូមព្រះមេត្តា និងមេត្តាជ្រាប» ។
«ឆ្លៀតក្នុងឱកាសនេះ គណៈសង្ឃនាយក នៃព្រះរាជាណាចក្រកម្ពុជា សូមជូនពរ ក្រុមហ៊ុន E-School Cambodia និង សាស្រ្តាចារ្យ ឡុង សារិន សូមទទួលបាននូវពុទ្ធពរទាំងបួនប្រការគឺ៖ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ» ៕
© រក្សាសិទ្ធិដោយលោកវិទូ
លោកវិទូចុះផ្សាយព័ត៌មានអនឡាញ អំពីព្រះពុទ្ធសាសនាខ្មែរ និងព្រះពុទ្ធសាសនាអន្តរជាតិថ្មីៗ ដើម្បីជាប្រយោជន៍ដល់ប្រិយមិត្តអ្នកអាន និងជាពន្លឺក្នុងការត្រិះរិះពិចារណា ក្នុងការប្រព្រឹត្តទៅ នៃព្រះពុទ្ធសាសនាក្នុងសង្គម ។
No comments:
Post a Comment