នេប៉ាល់ប្រតិកម្មនឹងឥណ្ឌាសាជាថ្មីរឿងដើមកំណើតរបស់ព្រះពុទ្ធជាម្ចាស់

រូបភាពឯកសារ រដ្ឋមន្ត្រីការបរទេសឥណ្ឌា លោក បណ្ឌិត អេស. ជ័យស័ង្ករ ។ រូបភាព៖ PTI

លោកវិទូ | ថ្ងៃ ១᧴៩ ឆ្នាំជូត ទោស័ក ព.ស. ២៥៦៤ | ០៩ សីហា ២០២០០

ប្រទេសជិតខាងដែលមានប្រជាជនកាន់សាសនាហិណ្ឌូភាគច្រើនទាំងពីរនេះ មានទំនាស់នឹងគ្នារឿងដើមកំណើតរបស់ព្រះពុទ្ធជាម្ចាស់មិនចប់មិនចេះហើយ ។ បញ្ហានេះបានផ្ទុះឡើងសាជាថ្មី នៅពេលដែលរដ្ឋមន្ត្រីការបរទេសឥណ្ឌា លោក អេស. ជ័យស័ង្ករ និយាយថាព្រះពុទ្ធជាម្ចាស់ និងមហាត្មៈ គន្ធី ជា«ជនជាតិឥណ្ឌាដ៏អស្ចារ្យ»ទាំងពីររូប ដែលប្រជាជនលើសកលលោកនៅចង់ចាំជានិច្ច ។ ក្រសួងការបរទេសនេប៉ាល់ប្រតិកម្មយ៉ាងខ្លាំងនឹងការលើកឡើងនេះ ។

យោងតាមការចុះផ្សាយរបស់កាសែតឌឺហិណ្ឌូស្ថានថែមស៍បានឲ្យដឹហថា នៅថ្ងៃអាទិត្យនេះ នេប៉ាល់បានឆ្លើយតបទៅការលើកឡើងរបស់រដ្ឋមន្ត្រីក្រសួងការបរទេសឥណ្ឌា លោក អេស. ជ័យស័ង្ករ ថាព្រះពុទ្ធជាម្ចាស់ជាបុគ្គលដ៏អស្ចារ្យមួយ ក្នុងចំណោមបុគ្គលដ៏អស្ចារ្យទាំងពីររូបរបស់ឥណ្ឌា សម្រាប់ប្រជាជនជុំវិញពិភពលោក ដោយនិយាយថា ភ័ស្តុតាងប្រវត្តិសាស្ត្រ និងបុរាណវិទ្យា បង្ហាញថាស្ថាបនិកព្រះពុទ្ធសាសនាបានប្រសូតនៅក្នុងទឹកដីប្រទេសនេប៉ាល់ ។

សេចក្តីថ្លែងការណ៍មួយចេញដោយអ្នកនាំពាក្យក្រសួងការបរទេសនេប៉ាល់និយាយថា «វាគឺជាការពិតដែលគេដឹងគ្រប់គ្នានិងមិនអាចប្រកែកបាន ដែលបង្ហាញដោយភ័ស្តុតាងប្រវត្តិសាស្រ្តនិងបុរាណវិទ្យាដែលថា ព្រះគោតមពុទ្ធទ្រង់បានប្រសូតនៅឧទ្យានលុម្ពិនី ប្រទេសនេប៉ាល់ ។ ឧទ្យានលុម្ពិនីដែលជាស្រុកកំណើតរបស់ព្រះពុទ្ធជាម្ចាស់និងជាប្រភពនៃព្រះពុទ្ធសាសនា គឺជាផ្នែកមួយនៃតំបន់បេតិកភណ្ឌពិភពលោករបស់អង្គការយូណេស្កូ» ។

ការបញ្ចេញមតិរបស់អ្នកនាំពាក្យរូបនេះត្រូវបានធ្វើឡើងក្នុងការឆ្លើយតបទៅនឹងសំណួររបស់អ្នកសារព័ត៌មាន អំពីការលើកឡើងរបស់រដ្ឋមន្ត្រីឥណ្ឌា ក្នុងកំឡុងពេលនៃវគ្គសំណេះសំណាលគ្នាមួយ ដែលរៀបចំឡើងដោយសហព័ន្ធឧស្សាហកម្មឥណ្ឌា (CII) កាលពីថ្ងៃសៅរ៍ ។ ពេលដែលនិយាយអំពីអំណាចទន់របស់ឥណ្ឌា លោក ជ័យស័ង្ករ បានពិពណ៌នាថា ពុទ្ធជាម្ចាស់ និងមហាត្មៈ គន្ធី គឺជា«ជនជាតិឥណ្ឌាដ៏អស្ចារ្យ»ទាំងពីររូប ដែលប្រជាជនជុំវិញពិភពលោកនៅចងចាំជានិច្ច ។

បន្តិចក្រោយមក អ្នកនាំពាក្យក្រសួងការបរទេសឥណ្ឌា លោក អនុរាគ ស្រីវាស្តវ បានធ្វើសេចក្តីបំភ្លឺថា មតិរបស់លោកជ័យស័ង្ករ បានសំដៅទៅលើបេតិកភ័ណ្ឌពុទ្ធសាសនារូមរបស់ឥណ្ឌានិងនេប៉ាល់ ។ គាត់បានមានប្រសាសន៍ថា ការលើកឡើងរបស់លោកជ័យស័ង្ករ «នៅឯព្រឹត្តិការណ៍ CII បានសំដៅទៅលើបេតិកភ័ណ្ឌពុទ្ធសាសនារួមរបស់យើង ។ គ្មានសេចក្តីសង្ស័យឡើយថា ព្រះគោតមពុទ្ធទ្រង់បានប្រសូតនៅឧទ្យានលុម្ពិនី ដែលនៅក្នុងប្រទេសនេប៉ាល់» ។

ការលើកឡើងរបស់លោកជ័យស័ង្ករបានបង្កជាព្យុះនៅនេប៉ាល់ ហើយមានការប្រឆាំងតវ៉ាជាច្រើន ពីគណបក្សនយោបាយ ដូចជា គណបក្សប្រឆាំងធំជាងគេ គណបក្សសមាជនេប៉ាល់ជាដើម និងជាលក្ខណៈបុគ្គល ដូចជា អតីតរដ្ឋលេខាធិការការបរទេស លោក មធុ រម័ន អាចាយ៌ និងអតីតនាយករដ្ឋមន្ត្រី មាធវ កុមារ នេបាល ដែលជាមេដឹកនាំកំពូលមួយរូបរបស់គណបក្សកាន់អំណាច គណបក្សកុម្មុយនីស្តនេប៉ាល់ ។

បន្ទាប់ពីមានការលើកឡើងរបស់រដ្ឋមន្ត្រីការបរទេសឥណ្ឌា អ្នកនាំពាក្យបក្សសមាជនេប៉ាល់ លោក ពិស្វៈ ប្រកាស សម៌ា បានបង្ហោះសារទ្វីធើថា «ព្រះពុទ្ធជាម្ចាស់ទ្រង់បានប្រសូតនៅប្រទេសនេប៉ាល់ ។ យើងមានការជំទាស់ដាច់អហង្ការ ចំពោះសេចក្តីថ្លែងការរបស់រដ្ឋមន្ត្រីការបរទេសឥណ្ឌាដែលប្រឆាំងនឹងភ័ស្តុតាងរឿងព្រេងនិងរឿងជាក់ស្ដែង ថា [តំបន់ដែលព្រះពុទ្ធជាម្ចាស់ទ្រង់បានប្រសូត] គឺជារបស់នេប៉ាល់នាពេលបច្ចុប្បន្ន» ។

អតីតរដ្ឋលេខាធិការការបរទេសនេប៉ាល់ លោក មធុ រម័ន អាចាយ៌ បង្ហោះសារទ្វីធើថា «ប្រមាណ ២២៧០ ឆ្នាំកន្លងទៅ ព្រះបាទធម្មាសោក បានសង់សសរស្តម្ភមួយនៅឯឧទ្យានលុម្ពិនី ដើម្បីកំណត់ទីតាំងកំណើតរបស់ព្រះពុទ្ធជាម្ចាស់ ។ សសរស្តម្ភនោះឈរនៅខ្ពស់ជាងការអះអាងបំបោងឡើងដោយខ្លួនឯងណាមួយដែលថា ព្រះពុទ្ធជាម្ចាស់ជា ‘ជនជាតិឥណ្ឌា!’ ខណ្ឌ!!» ៕

© រក្សាសិទ្ធិដោយលោកវិទូ