 |
| ព្រះសង្ឃនិងពុទ្ធបរិស័ទធ្វើធម្មយាត្រា នៅពុទ្ធស្ថានសង្កស្ស រដ្ឋឧត្តរប្រទេស, ២០ តុលា ២០២១ ។ រូបភាព៖ Janhit Times |
លោកវិទូ | ថ្ងៃ ៥᧯១២ ឆ្នាំឆ្លូវ ត្រីស័ក ព.ស. ២៥៦៥ | ២១ តុលា ២០២១
ភាពតានតឹងបានកើតមានឡើង នៅក្នុងតំបន់សក្ការបូជាព្រះពុទ្ធសាសនាសង្កស្ស កាលពីថ្ងៃពុធម្សិលមិញ នៅពេលដែលមនុស្សមួយចំនួនបានដកទង់សាសនាហិណ្ឌូចេញពីវិហារមួយ ហើយលើកទង់ព្រះពុទ្ធសាសនា ដែលបានធ្វើឱ្យមានការតវ៉ាដោយហិង្សា ។
ឧប្បត្តិហេតុនេះបានកើតឡើងក្នុងកំឡុងពេល «ធម្មយាត្រា» ដោយអ្នកធ្វើធម្មយាត្រាព្រះពុទ្ធសាសនា ។
ប៉ូលីសបាននិយាយថា មនុស្សខ្លះបានឡើងលើវិហារហិណ្ឌា ពិសារីទេវី ដែលមានទីតាំងនៅលើភ្នំតូចមួយ ដែលមានជម្លោះនៅក្នុងតំបន់សក្ការៈបូជាព្រះពុទ្ធសាសនាសង្កស្ស ហើយបានដកទង់សាសនាហិណ្ឌូចេញ និងជំនួសដោយទង់ព្រះពុទ្ធសាសនាវិញ ។
អ្នកកាន់ព្រះពុទ្ធសាសនាអះអាងថា កន្លែងមានវិវាទនេះគឺជាស្តូបព្រះពុទ្ធសាសនា ដែលមានសារៈសំខាន់ខាងសាសនាយ៉ាងធំធេង សម្រាប់ពួកគេចំណែកឯអ្នកសាសនាហិណ្ឌូ សនាតន វិញ បានអះអាងថា វាជាវិហារបុរាណរបស់ព្រះម៉ែពិសារីទេវី ដែលជាកន្លែងតម្កល់រូបហនុមានផងដែរ ។ ជម្លោះនៅតំបន់នេះស្ថិតក្នុងតុលាការប្រហែល ៤០ ឆ្នាំ ។
ក្រុមសកម្មជនហិណ្ឌូមួយក្រុមបានធ្វើបាតុកម្ម បន្ទាប់ពីហេតុការណ៍ទង់ដកទង់សាសនាហិណ្ឌូចេញពីកន្លែងនោះ ហើយមានការគប់ដុំថ្មរវាងភាគីទាំងពីរ ដែលមនុស្សមួយចំនួនបានរងរបួសស្រាល ។ ប៉ូលីសបាននិយាយថា ក្រោយមកសកម្មជនហិណ្ឌូបានបិទផ្លូវធំ ។
ចៅក្រមស្រុក លោក មានវេន្ទ្រ សិង្ហ (Manvendra Singh) និងអគ្គស្នងការនគរបាល លោក អសោក កុមារ មីណា (Ashok Kumar Meena) បានទៅដល់កន្លែងកើតហេតុភ្លាមៗ ជាមួយកម្លាំងប៉ូលីស ហើយបានព្យាយាមធ្វើឱ្យក្រុមបាតុករដែលមានកំហឹងស្ងប់ចិត្ត ។
ពួកគេបាននិយាយថា ផ្លូវនេះត្រូវបានបើកវិញ មួយសន្ទុះក្រោយមក ហើយស្ថានការណ៍ត្រូវបានគ្រប់គ្រង ។
យោងតាមការណែនាំរបស់ចៅក្រមស្រុក ចៅក្រមឃុំ លោក អនិល កុមារ (SDM Anil Kumar) បានផ្តល់ការធានាជាលាយលក្ខណ៍អក្សរថា ការខូចខាតណាមួយនៅវិហារពិសារីទេវី នឹងត្រូវជួសជុលឡើងវិញ ។
ពុទ្ធស្ថានសង្កស្ស
ទីនេះពុទ្ធបរិស័ទ និងអ្នកធម្មយាត្រាខ្មែរនិងអន្តរជាតិស្គាល់ថាជាកន្លែង ដែលព្រះសម្មាសម្ពុទ្ធទ្រង់យាងចុះចាកស្ថានតាវត្តិង្ស ដែលបច្ចុប្បន្នហៅ សង្កស្ស ឬ សង្គិស នៅក្នុងរដ្ឋឧត្តរប្រទេស ។ តាមពុទ្ធប្បវត្តិដំណាលថា ក្នុងវស្សាទី៧ ព្រះអង្គទ្រង់បានយាងទៅសម្ដែងព្រះអភិធម្មជាលើកដំបូង ដើម្បីប្រោសពុទ្ធមាតា និងពពួកទេពនិករ ព្រមទាំងព្រហ្មទេពផងដែរ នៅស្ថានតាវត្តិង្ស ។ បន្ទាប់ពីសម្តែងធម៌ប្រោសពុទ្ធមាតាឱ្យបានសម្រេចធម៌តាមសមគួរហើយនោះ ព្រះអង្គទ្រង់សម្តែងនូវពុទ្ធានុភាពបើកត្រៃភពឱ្យមើលឃើញគ្នា និងទ្រង់យាងចុះមកកាន់ភពផែនដីវិញ នៅត្រង់នគរសង្កស្សៈ ព្រមទាំងទ្រង់សម្តែងព្រះសទ្ធម្មទេសនា នៅថ្ងៃបវារណាចេញវស្សា ។
បច្ចុប្បន្ន ទីនេះជាទីសក្ការបូជាយ៉ាងសំខាន់ សម្រាប់ពុទ្ធបរិស័ទ ជាពិសេសអ្នកធម្មយាត្រាខ្មែរ ។ នៅទីនេះមានវត្តខ្មែរមួយឈ្មោះ វត្តខ្មែរសង្កស្ស ។ ក្រោយពីការសាបសូន្យព្រះពុទ្ធសាសនាពីជម្ពូទ្វីបអស់ជាច្រើនសតវត្សរ៍ ដោយសារការយាយីពីសម្នាក់ពាហិរសាសនា ទីពុទ្ធស្ថានប្រវត្តិសាស្ត្រជាច្រើនកន្លែងត្រូវបានគ្រប់គ្រងដោយសាសនាផ្សេង ។ លុះដល់សម័យឯករាជ្យ ពុទ្ធបរិស័ទចាប់ផ្ដើមទាមទារសិទ្ធិគ្រប់គ្រងពុទ្ធស្ថាននោះមកវិញបានខ្លះមិនបានខ្លះ ហើយស្ថិតនៅជាប់គាំងនៅក្នុងដៃតុលាការខ្លះដោះស្រាយមិនចេញ ដូចជាករណីពុទ្ធស្ថានសង្កស្សនេះជាអាទិ ៕
© រក្សាសិទ្ធិដោយលោកវិទូ
លោកវិទូចុះផ្សាយព័ត៌មានអនឡាញ អំពីព្រះពុទ្ធសាសនាខ្មែរ និងព្រះពុទ្ធសាសនាអន្តរជាតិថ្មីៗ ដើម្បីជាប្រយោជន៍ដល់ប្រិយមិត្តអ្នកអាន និងជាពន្លឺក្នុងការត្រិះរិះពិចារណា ក្នុងការប្រព្រឹត្តទៅ នៃព្រះពុទ្ធសាសនាក្នុងសង្គម ។
No comments:
Post a Comment