 |
| ពុទ្ធបរិស័ទបានប្រមូលផ្តុំគ្នាប្រារព្ធពិធីបុណ្យបូជាបទីប (ពន្លឺ) ក្នុងថ្ងៃបុណ្យចូលវស្សាកាលពីនៅថ្ងៃអាទិត្យ ។ រូបភាព៖ AFP |
ពុទ្ធបរិស័ទរាប់ពាន់នាក់បានប្រមូលផ្តុំគ្នានៅព្រះវិហារស្វេដាហ្គោន ក្នុងប្រទេសភូមា ដើម្បីប្រារព្ធពិធីបុណ្យពេញបូណ៌មីនៃពិធីបុណ្យ Thadingyut (បុណ្យចេញព្រះវស្សា) កាលពីថ្ងៃអាទិត្យ ដោយខ្លះថ្វាយបង្គំបួងសួង សុំសេចក្តីសុខចម្រើនដល់ប្រទេសជាតិ ដែលបានធ្លាក់ចូលទៅក្នុងភាពចលាចលដោយរដ្ឋប្រហារកាលពីដើមឆ្នាំ២០២១ ។
ពិធីបុណ្យរយៈពេលបីថ្ងៃ គឺជាថ្ងៃដែលព្រះពុទ្ធបានយាងចុះពីឋានសួគ៌ ហើយជាធម្មតាគេប្រារព្ធពិធីបុណ្យនេះដោយការបាញ់កាំជ្រួច ដោយមានទៀន និងគោមចម្រុះពណ៌បំភ្លឺតាមដងផ្លូវ និងផ្ទះ ។
នាពេលព្រឹកព្រហាម មនុស្សម្នាជាច្រើនកុះករបានតម្រង់ជួរ នៅក្នុងមជ្ឈមណ្ឌលពាណិជ្ជកម្មទីក្រុងយ៉ាំងហ្គោន ដើម្បីបួងសួងនៅព្រះវិហារស្វេដាហ្គោន ដែលស្រោបដោយមាស ដែលជាកន្លែងព្រះពុទ្ធសាសនាដ៏សំខាន់បំផុតរបស់ប្រទេសភូមា ។ កាលប្បវត្តិក្នុងស្រុកនិយាយថា ព្រះវិហារមាសនេះមានតម្កល់ព្រះកេសធាតុរបស់ព្រះសម្មាសម្ពុទ្ធ ។
នៅក្នុងបរិវេណដ៏សំខាន់ មនុស្សម្នាបានសម្រុកចូលទៅក្នុងរង្វង់មូលនៃព្រះវិហារ ដោយខ្លះឈប់ថតរូប Selfie អុជទៀន ឬដុតធូប ។ រីឯអ្នកផ្សេងទៀតបានឈរមួយឡែកដើម្បីនមស្ការបួងសួងស្ងាត់ៗ ។
បុរសម្នាក់មកពីទីប្រជុំជន Thone Gwa ក្នុងទីក្រុងយ៉ាំងហ្គោន បាននិយាយថា៖ «យើងមិនបានមកទីនេះច្រើនឆ្នាំមកហើយ ដូច្នេះយើងបានចាកចេញពីផ្ទះឲ្យបានឆាប់ ដើម្បីជៀសវាងមនុស្សម្នាច្រើន ប៉ុន្តែមានមនុស្សច្រើននៅវត្តរួចទៅហើយ» ។ គាត់មិនចង់ប្រាប់ឈ្មោះរបស់គាត់ទេ ។ «ខ្ញុំគិតថាប្រជាពលរដ្ឋជួបការលំបាកក្នុងជីវិតប្រចាំថ្ងៃ ហើយពួកគេចង់ចេញពីផ្ទះ» ។
ប្រទេសភូមាបានស្ថិតក្នុងភាពចលាចល ចាប់តាំងពីយោធាបានបណ្តេញរដ្ឋាភិបាលលោកស្រី អ៊ុងសាន ស៊ូជី កាលពីឆ្នាំ២០២១ ដោយមានការបន្តប្រយុទ្ធគ្នាតនៅទូទាំងតំបន់ជាច្រើន និងសេដ្ឋកិច្ចស្ថិតក្នុងភាពរអាក់រអួល ។
ដើម្បីប្រារព្ធពិធីបុណ្យ Thadingyut ក្នុងឆ្នាំ២០២១ របបយោធាបានប្រកាសលើកលែងទោស ដល់បាតុកររាប់រយនាក់ដែលត្រូវបានឃុំខ្លួន ចាប់តាំងពីរដ្ឋប្រហារ ដោយបានបញ្ជូនក្រុមគ្រួសាររបស់អ្នកទោស យ៉ាងប្រញាប់ប្រញាល់ ទៅកាន់ច្រកទ្វារពន្ធនាគារ និងបង្កឲ្យមានការជួបជុំគ្នាឡើងវិញ ដ៏រីករាយនៅទូទាំងប្រទេស ។
រហូតមកដល់ពេលនេះ របបយោធាមិនទាន់បានប្រកាសពីការលើកលែងទោសណាមួយ ដើម្បីអប់អរសាទរពិធីបុណ្យរយៈពេលបីថ្ងៃក្នុងឆ្នាំ២០២២នេះ ដែលនឹងត្រូវបញ្ចប់នៅថ្ងៃច័ន្ទនេះ ៕
© រក្សាសិទ្ធិដោយលោកវិទូ
លោកវិទូចុះផ្សាយព័ត៌មានអនឡាញ អំពីព្រះពុទ្ធសាសនាខ្មែរ និងព្រះពុទ្ធសាសនាអន្តរជាតិថ្មីៗ ដើម្បីជាប្រយោជន៍ដល់ប្រិយមិត្តអ្នកអាន និងជាពន្លឺក្នុងការត្រិះរិះពិចារណា ក្នុងការប្រព្រឹត្តទៅ នៃព្រះពុទ្ធសាសនាក្នុងសង្គម ។
No comments:
Post a Comment