ព្រះមហាវិមលធម្មនិមន្តទៅកម្ពុជាក្រោមជាលើកដំបូងដោយព្រះទ័យ «សប្បាយរីករាយជាទីបំផុត»

ព្រះមហាវិមលធម្ម ពិន សែម ព្រមទាំងញោមញាតិពុទ្ធបរិស័ទខ្មែរកម្ពុជាក្រោម នាវត្តកទ្ទសីមាចំប៉ាជើងភ្នំក្រាំងចាយ, ២០ តុលា ២០២២ ។ រូបភាព៖ ទំព័រហ្វេសប៊ុក ព្រះមហាវិមលធម្ម ពិន សែម សិរីសុវណ្ណោ

លោកវិទូ | ថ្ងៃ ៤᧢១២ ឆ្នាំខាល ចត្វាស័ក ព.ស. ២៥៦៦ | ២៦ តុលា ២០២២ 

កាលពីថ្ងៃព្រហស្បតិ៍ ១០រោច ខែអស្សុជ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី២០ ខែតុលា ឆ្នាំ២០២២ ព្រះមហាវិមលធម្ម ពិន សែម បាននិមន្តទៅកាន់ទឹកដីកម្ពុជាក្រោម អតីតដែនសុវណ្ណភូមិនៃកម្ពុជា ក្នុងឱកាសកម្មវិធីបុណ្យកឋិនទានវត្តកទ្ទសីមាចំប៉ាជើងភ្នំក្រាំងចាយ ស្ថិតនៅភូមិក្រាំងចាយ ឃុំតឹងឡើយ ស្រុកទិញបៀង ខេត្តអានយ៉ាង ដោយមានព្រះទ័យ «សប្បាយរីករាយជាទីបំផុត» ។

យោងតាមព្រះថេរដីការបស់ព្រះអង្គ នៅខាងដើមនៃការសម្ដែងព្រះធម៌ទេសនា នាវត្តកទ្ទសីមាចំប៉ាជើងភ្នំក្រាំងចាយ បានឲ្យដឹងថា នេះជាលើកដំបូងហើយ ដែលព្រះមហាវិមលធម្មបានមិន្តទៅកាន់ដែនដីកម្ពុជាក្រោម តាមរយៈការនិមន្តទុកមុនជាយូរណាស់មកហើយរបស់ព្រះភិក្ខុមួយអង្គ ដែលតំណាងឲ្យពុទ្ធបរិស័ទខ្មែរកម្ពុជាក្រោមទាំងអស់ ក្នុងឱកាសកឋិនកាលនេះ ។ 

ព្រះអង្គមានព្រះទ័យរីករាយជាអនេក ដោយបានមានព្រះថេរដីកា (ដែលហាក់ដូចជាប្រុងប្រយ័ត្នណាស់) ថា៖ «ខ្ញុំព្រះករុណាអាត្មា ក៏មានបំណង ក៏សប្បាយចិត្តជាទីបំផុត បានធ្វើដំណើរឆ្ងាយ...មួយជីវិតនេះអត់ដែលបានចូលមកដល់ទឹកដីវៀតណាមទេ អត់ដែលសោះ ។ ក៏ថ្លែងអំណរអរគុណដល់ញោមញាតិពុទ្ធបរិស័ទដែរ ដែលបានមកឃើញទឹកដីប្រទេសវៀតណាមហ្នឹង ពីមុនឮតែឈ្មោះទេ ឥឡូវបានចូលមកដល់ហើយ» ។

ជាការកម្រណាស់ ដែលមានមន្ត្រីសង្ឃជាន់ខ្ពស់នៃគណៈសង្ឃកម្ពុជា និមន្តទៅកាន់ទឹកដីកម្ពុជាក្រោម បើបានទៅហើយសឹងតែស្បថមិនហ៊ានទៅទៀត ដោយសារការធ្វើទុក្ខបុកម្នេញពីសម្នាក់អាជ្ញាធរវៀតណាមដោយប្រការផ្សេងៗ ។ ការសម្ដែងធម៌នៅទីនោះទៀតសោត ត្រូវមានរបៀបវារៈត្រឹមត្រូវឲ្យអាជ្ញាធរដឹង និងចៀងវាងការលើកឡើងអំពីប្រវត្តិសាស្ត្រខ្មែរកម្ពុជាក្រោម ។

ប្រមាណដប់ឆ្នាំមុន យើងឃើញមានព្រះធម្មកថិកនិងធម្មាចារ្យល្បីៗ ដូចជា លោកគ្រូអគ្គធម្មាចារ្យ ប៊ុត សាវង្ស និងព្រះគ្រូ សាន សុជា ជាដើម បានទៅដល់ទីនោះ និងថែមទាំងបានហែកឋិនទៅប្រគេនព្រះសង្ឃខ្មែរនៅទីនោះទៀតផង ។ តែក្នុងរយៈពេលមួយទសវត្សរ៍ចុងក្រោយនេះ ចលនានេះបានសាបសូន្យទៅវិញ ។

គួររំឭកផងដែរថា ទំនាក់ទំនងពុទ្ធសាសនាខ្មែរនិងខ្មែរកម្ពុជាក្រោម នៅមានជាប្រក្រតីក្នុងសម័យអាណានិគមបារាំង (១៨៦៣-១៩៥៣) សម័យសង្គមរាស្ត្រនិយម (១៩៥៣-១៩៧០) រហូតដល់សម័យសាធារណរដ្ឋខ្មែរ (១៩៧០-១៩៧៥) ។ ក្រោយតំបន់ឥណ្ឌូចិនបានធ្លាក់ក្នុងដៃពួកកុម្មុយនិស្ត ទំនាក់ទំនងនេះត្រូវបានផ្ដាច់ស្ទើរទាំងស្រុង ។

យោងតាមការចុះផ្សាយរបស់វិទ្យុអាស៊ីសេរីខេមរភាសាបានឲ្យដឹងថា «ក្រោម​ការ​គ្រប់គ្រង​របស់​បារាំង បារាំង បាន​បើក​ចំហ​ឲ្យ​ព្រះសង្ឃ និង​ពលរដ្ឋ​ខ្មែរ​នៅ​កម្ពុជា មាន​ឱកាស​គ្រប់គ្រាន់​ធ្វើ​ដំណើរ​ទៅ​ជួប និង​សួរ​សុខ​ទុក្ខ​ព្រះសង្ឃ និង​ពលរដ្ឋ​ខ្មែរ​នៅ​កម្ពុជា​ក្រោម ហើយ​ព្រះសង្ឃ​ខ្មែរ​ក្រោម​ជាច្រើន ត្រូវ​បាន​សម្ដេច​ព្រះ​សង្ឃរាជ និង​ព្រះមហាក្សត្រ​ខ្មែរ​សម័យ​នោះ បាន​ផ្តល់អាហារូបករណ៍​ឲ្យ​មក​បន្ត​ការ​សិក្សា ​ក្នុង​សាលា​បាលី​ជាន់​ខ្ពស់​នៅ​កម្ពុជាទៀត​ផង។ លើស​ពី​នេះ ព្រះសង្ឃ​ខ្មែរ​ក្រោម​ក៏​ត្រូវ​បាន​អាជ្ញាធរ​កម្ពុជា និមន្ត​ចូល​រួម​ក្នុង​ពិធី​ពុទ្ធសាសនា​សំខាន់ៗ​ជាច្រើន» ។

តួយ៉ាង សម្ដេចព្រះមហាសុមេធាធិបតី ជួន ណាត និងកល្យាណមិត្តរបស់ព្រះអង្គ សម្ដេចព្រះមហាពោធិវ័ង្ស ហួត តាត សុទ្ធតែធ្លាប់បានយាងទៅកាន់ដែនដីកម្ពុជាក្រោម ។

ព្រះមហាវិមលធម្ម ពិន សែម ព្រះរាជាគណៈថ្នាក់ទោ សំពះគោរពចំពោះព្រះតេជគុណព្រះឧបជ្ឈាយ៍ ខណ្ឌកោ ចៅទី នៃខេត្តមាត់ជ្រូក កម្ពុជាក្រោម ដែលជាភិក្ខុមានវស្សាចាស់ជាង ។ រូបភាព៖ ហ្វេសប៊ុក Khmer Ancestral Culture

ដូច្នេះ ដំណើរនិមន្តរបស់ព្រះមហាវិមលធម្មនាពេលនេះ ហាក់បានរំឭកឡើងវិញនូវទំនាក់ទំនងវប្បធម៌ពុទ្ធសាសនា រវាងកម្ពុជានិងកម្ពុជាក្រោម ដែលមានឈាមជ័រជាខ្មែរដូចគ្នា តែត្រូវបែងចែកពីគ្នាដោយព្រំដែនសីមានយោបាយ ក្នុងសម័យក្រោយអាណានិគមនិយម ។

ក្នុងន័យនេះ ព្រះមហាវិមលធម្ម ពិន សែម ក៏បានមានព្រះសង្ឃដីកាផងដែរថា «យើងទាំងអស់គ្នានេះ តាមលោកអ្នកប្រាជ្ញបណ្ឌិតក្នុងសាសនាថា ជាមិត្ត មិត្តនឹងគ្នារួមបីយ៉ាង ។ មិត្តទី១ គឺរួមជាតិ យើងជាតិជាមនុស្សដូចគ្នាទាំងអស់ ជាតិជាមនុស្ស ។ ទីពីរ រួមសាសន៍ យើងជ្រកក្រោមម្លប់ព្រះពុទ្ធសាសនាដូចគ្នា ។ ទីបី រួមទុក្ខ កើតចាស់ឈឺស្លាប់ដូចគ្នា ។ បីហ្នឹងគឺរួមគ្នា ស្មើគ្នាធេងពរ» ។ 

ព្រះអង្គបានមានព្រះថេរដីកាបន្ថែមទៀត ដោយចៀសវាងប្រើពាក្យ«ខ្មែរកម្ពុជាក្រោម»ថា «ហ្នឹងបានខ្ញុំព្រះករុណាអាត្មាបានមកដល់ទីនេះ មានបីតិសោមនស្ស ជាទីបំផុត ។ សំខាន់បំផុតគឺមិនដែលឃើញទឹកដីវៀតណាមទេ ឮតែឈ្មោះ ឥឡូវបានចូលមកដល់» ។

វត្តមានរបស់ព្រះអង្គក្នុងឱកាសបុណ្យកឋិនទាននេះ គឺជាការសម្រេចតាមវត្ថុបំណងរបស់ព្រះអង្គផ្ទាល់ផង និងបានញ៉ាំងសទ្ធាជ្រះថ្លារបស់ពុទ្ធបរិស័ទខ្មែរកម្ពុជាក្រោមឲ្យខ្លាំងឡើង ដោយមានទឹកមុខសប្បាយរីករាយឥតឧបមា តាមបំណងរបស់ខ្លួនដែលចង់ស្តាប់ព្រះធម៌របស់ព្រះមហាវិមលធម្មផង ។

យោងតាមរដ្ឋធម្មនុញ្ញនៃព្រះរាជាណាចក្រកម្ពុជា ប្រជាពលរដ្ឋខ្មែរក្រោម ជាជនជាតិខ្មែរ មានសញ្ជាតិខ្មែរ ដូចប្រជាពលរដ្ឋខ្មែរ នៅព្រះរាជាណាចក្រកម្ពុជាដែរ ៕

© រក្សាសិទ្ធិដោយលោកវិទូ