ព្រះសង្ឃពុទ្ធសាសនាកូរ៉េចូលរួមរំលែកទុក្ខជនរងគ្រោះក្នុងឧបទ្ទវហេតុថ្ងៃបុណ្យហាឡូវីន

ព្រះសង្ឃពុទ្ធសាសនាកូរ៉េនិកាយ Jogye សូត្រធម៌ឧទ្ទិសចំពោះជនរងគ្រោះដែលបានបាត់បង់ជីវិត នៅ Itaewon កាលពីថ្ងៃច័ន្ទ ។  រូបភាព៖ សារព័ត៌មានយ៉ុនហាប់

លោកវិទូ | ថ្ងៃ ២᧢១២ ឆ្នាំខាល ចត្វាស័ក ព.ស. ២៥៦៦ | ១ វិច្ឆិកា ២០២២

ព្រះសង្ឃពុទ្ធសាសនា រួមជាមួយបព្វជិតអាចារ្យនៃសាសនាដទៃក្នុងប្រទេសកូរ៉េ បានសម្តែងការសោកសៅ និងចូលរួមរំលែកទុក្ខ ចំពោះការកើនឡើងនៃចំនួនមនុស្សដែលបានបាត់បង់ជីវិតដ៏សោកនាដកម្ម ដែលបានកើតឡើងនៅក្នុងសង្កាត់ Itaewon នៃទីក្រុងសេអ៊ូល កាលពីយប់ថ្ងៃសៅរ៍ ។

កាល​ពី​ថ្ងៃ​ច័ន្ទ មេ​ដឹក​នាំ​សាសនា​នានាបាន​ទៅ​ទស្សនា​កន្លែង​គោរព​វិញ្ញាណក្ខន្ធ ​ដើម្បី​គោរព​វិញ្ញាណក្ខន្ធ​ជនរងគ្រោះ​នៃ​ការ​រត់​ជាន់​គ្នា​ដែល​បាន​ធ្វើឲ្យ​មនុស្សចំនួន ១៥៤ ​នាក់ស្លាប់ ។

ព្រះសង្ឃចំនួនដប់អង្គមកពីសាសនាព្រះពុទ្ធសាសនាកូរ៉េនិកាយជោគយី បានទៅទស្សនាកន្លែងរំលឹកវិញ្ញាណក្ខន្ធ នៅជិតច្រកចេញនៃស្ថានីយ៍រថភ្លើងក្រោមដី Itaewon ហើយបានសូត្រធម៌តាមបែបពុទ្ធសាសនា ។

លោក Peter Chung Soon-taick ដែលជាអាចារ្យគ្រិស្តសាសនានៃទីក្រុងសេអ៊ូល បានដឹកនាំគណៈសង្ឃមួយក្រុមទៅកាន់ទីអាសនៈគោរពវិញ្ញាណក្ខន្ធរួមគ្នានៅ Seoul Plaza ទល់មុខសាលាក្រុងសេអ៊ូល ក្នុងទីក្រុង Jung-gu ក្នុងថ្ងៃតែមួយ ។

ក្រុម​សាសនាទាំងនេះ​ក៏​បាន​ផ្តល់​សារ​រំលែក​ទុក្ខ និង​អំពាវនាវ​ដល់​អាជ្ញាធរ​ក្នុង​សេចក្តី​ថ្លែងការណ៍របស់ខ្លួន ។

សមាគម វិហារគ្រិសសាមគ្គីនៃប្រទេសកូរ៉េ (United Christian Churches of Korea) ដែលជាសមាគមដ៏ធំបំផុតមួយនៃវិហារប្រូតេស្តង់ បាននិយាយនៅក្នុងសេចក្តីថ្លែងការណ៍មួយថា «យើងសូមចូលរួមរំលែកទុក្ខដ៏ក្រៀមក្រំបំផុតរបស់យើងចំពោះជនរងគ្រោះ និងក្រុមគ្រួសាររបស់ពួកគេ ក្នុងឧបទ្ទវហេតុដែលមិននឹកស្មានដល់នៅ Itaewon កាលពីយប់ថ្ងៃសៅរ៍ ។

ស្រដៀងគ្នានេះដែរ ពុទ្ធសាសនានិកាយ Jogye ដែលជានិកាយព្រះពុទ្ធសាសនាដ៏ធំបំផុតរបស់ប្រទេសកូរ៉េ ក៏បានចេញលិខិតចូលរួមរំលែកទុក្ខ និងបាននិយាយថា «ឧបទ្ទវហេតុដ៏សោកសៅមួយទៀតបានកើតឡើងនៅក្នុងសង្គមរបស់យើង ។ អាជ្ញាធរ​គួរ​ពិនិត្យ​ឲ្យ​បាន​ហ្មត់ចត់​ពី​មូលហេតុ​នៃ​មហន្តរាយ​នេះ ដើម្បី​កុំ​ឲ្យ​មាន​ការ​លះបង់​របស់​យុវជន​តទៅ​ទៀត» ។

សមាគមពុទ្ធសាសនិកកូរ៉េ ដែលត្រូវបានបង្កើតឡើងក្នុងឆ្នាំ១៩៦៧ ក៏បានចូលរួមរំលែកទុក្ខដល់ជនរងគ្រោះ និងក្រុមគ្រួសារនៃសពផងដែរ ។

នៅក្នុងសេចក្តីថ្លែងការណ៍របស់ខ្លួន សមាគមពុទ្ធសាសនាកូរ៉េបានលើកឡើងថា «សហគមពុទ្ធសាសនិក សោកស្ដាយសោកនាដកម្មនេះ ដែលបណ្តាលឲ្យមានអ្នកស្លាប់ និងរបួសយ៉ាងច្រើន ។ រដ្ឋាភិបាលគួរតែស៊ើបអង្កេតឲ្យបានដិតដល់នូវមូលហេតុ និងបង្កើតវិធានការសុវត្ថិភាព ដើម្បីទប់ស្កាត់សោកនាដកម្មបែបនេះកុំឲ្យកើតឡើងម្តងទៀត» ។

សមាគម​បាន​បន្ថែម​ថា «វីដេអូ​និង​ការ​អត្ថាធិប្បាយ​ដែល​មិន​ប្រុងប្រយ័ត្ន គឺជា​ការ​ឈឺចាប់ និង​ទុក្ខ​សោកសម្រាប់​គ្រួសារ​ដែល​បាន​បាត់បង់​ជីវិត» ។

ក្រុមប្រឹក្សាអ្នកដឹកនាំសាសនាកូរ៉េ (KCRL) បាននិយាយកាលពីថ្ងៃច័ន្ទផងដែរថា «សោកនាដកម្មនេះនៅក្នុងបេះដូងនៃទីក្រុងសេអ៊ូល គឺជាឧបទ្ទវហេតុដែលមិនគួរកើតមាសោះឡើយ ។ យើងមានការសោកស្ដាយជាទីបំផុតនោះគឺថា ភាគច្រើននៃជនរងគ្រោះគឺជាយុវជន ដែលចង់រីករាយនឹងពិធីបុណ្យមួយ» ។

អង្គការនេះគឺជាស្ថាប័នពិគ្រោះយោបល់នៃនិកាយសាសនាចំនួនប្រាំពីរនៅក្នុងប្រទេស រួមមាន ព្រះពុទ្ធសាសនា ពុទ្ធសាសនាវ៉ុន សាសនាកាតូលិក ប្រូតេស្ដង់ លទ្ធិឆេនដូ លទ្ធិខុងជឺ និងសមាគមសាសនាជាតិកូរ៉េ ៕

© រក្សាសិទ្ធិដោយលោកវិទូ