 |
| សម្ដេចសង្ឃដាឡៃឡាម៉ាចេញសារអបអរសាទរលោក អាន់វ៉ា អ៊ីប្រាហ៊ីម ។ |
លោកវិទូ | ថ្ងៃ ៦᧢១ ឆ្នាំខាល ចត្វាស័ក ព.ស. ២៥៦៦ | ២៥ វិច្ឆិកា ២០២២
ធម្មសាលា, ប្រទេសឥណ្ឌា, ថ្ងៃទី២៤ ខែវិច្ឆិកា៖ សម្តេចសង្ឃដាឡៃឡាម៉ា បានសរសេរទៅកាន់លោក អាន់វ៉ា អ៊ីប្រាហ៊ី (Anwar Ibrahim) ដើម្បីអបអរសាទរលោក ក្នុងឱកាសក្លាយជានាយករដ្ឋមន្ត្រីនៃប្រទេសម៉ាឡេស៊ី ។
សម្ដេចសង្ឃទីបេត៍បានសរសេររំឭកថា «ខ្ញុំរីករាយដែលធ្លាប់បានទៅលេងប្រទេសដ៏ស្រស់ស្អាតរបស់លោក ក្នុងឆ្នាំ ១៩៨២ នៅពេលខ្ញុំត្រូវបានអញ្ជើញឲ្យសុន្ទរកថាអំពីសន្តិភាព និងការទទួលខុសត្រូវជាសកល ។ ខ្ញុំក៏សប្បាយចិត្តផងដែរដែលបានមានឱកាសផ្លាស់ប្តូរទស្សនៈ ជាមួយអតីតនាយករដ្ឋមន្ត្រី លោក ទុនគូ អាឌុល រ៉ាហ៍ម៉ាន (Tunku Abdul Rahman) និងមេដឹកនាំដទៃទៀត» ។
«ពេលវេលសានេះគឺជាពេលវេលាដ៏លំបាកខ្លាំងណាស់ ។ ខ្ញុំមានក្តីសង្ឃឹមថា ប្រទេសម៉ាឡេស៊ីនឹងបន្តរីកចម្រើន និងរួមចំណែកយ៉ាងសំខាន់ចំពោះសន្តិភាព និងស្ថិរភាពនៃពិភពលោក ដែលមានទំនាក់ទំនងគ្នាកាន់តែខ្លាំងឡើង។ ខ្ញុំសូមជូនពរឲ្យលោកទទួលបានជោគជ័យ ក្នុងការឆ្លងកាត់ឧបសគ្គដែលនៅខាងមុខ ក្នុងការបំពេញក្តីសង្ឃឹម និងសេចក្តីប្រាថ្នារបស់ប្រជាជនម៉ាឡេស៊ី» ។
កាសែត The Straits Times បានរាយការណ៍ថា កាលពីព្រឹកម្សិលមិញ រាជវាំងនៃប្រទេសម៉ាឡេស៊ី ក្នុងសេចក្តីថ្លែងការណ៍មួយបានប្រកាសថា អាន់វ៉ា អ៊ីប្រាហ៊ីម នឹងក្លាយជានាយករដ្ឋមន្ត្រីថ្មី ហើយការសម្រេចចិត្តនេះត្រូវបានធ្វើឡើង បន្ទាប់ពីព្រះមហាក្សត្របានពិភាក្សាជាមួយអ្នកគ្រប់គ្រងផ្សេងទៀត នៅក្នុងកិច្ចប្រជុំពិសេសនៃស្តេចទាំងប្រាំបួនរបស់ប្រទេសនេះ ។
នៅក្នុងដំណើរជីវិតនយោបាយ លោក អាន់វ៉ា អ៊ីប្រាហ៊ី បានធ្វើជាមេដឹកនាំបក្សប្រឆាំងម៉ាឡេស៊ីមួយរូប អស់រយៈពេលជាងពីរទសវត្សរ៍មកហើយ ហើយធ្លាប់បានជាប់ពន្ធនាគារទៀតផង ហើយពេលនេះលោកបានក្លាយជានាយករដ្ឋមន្ត្រីទី១០ របស់ប្រទេសម៉ាឡេស៊ី ដែលជាប្រទេសប្រកាន់យកសាសនាឥស្លាម ជាសាសនារបស់រដ្ឋ ៕
© រក្សាសិទ្ធិដោយលោកវិទូ
លោកវិទូចុះផ្សាយព័ត៌មានអនឡាញ អំពីព្រះពុទ្ធសាសនាខ្មែរ និងព្រះពុទ្ធសាសនាអន្តរជាតិថ្មីៗ ដើម្បីជាប្រយោជន៍ដល់ប្រិយមិត្តអ្នកអាន និងជាពន្លឺក្នុងការត្រិះរិះពិចារណា ក្នុងការប្រព្រឹត្តទៅ នៃព្រះពុទ្ធសាសនាក្នុងសង្គម ។
No comments:
Post a Comment