ព្រះវិហារវត្តថៃមួយត្រូវភ្លើងឆាបឆេះដោយចៃដន្យក្នុងពិធីបុណ្យបង្ហោះចង្កៀងគោម

រូបភាពភ្លើងកំពុងឆាបឆេះព្រះវិហារយ៉ាងសន្ធោសន្ធៅ, ខេត្តឈៀងម៉ៃ, ៨ វិច្ឆិកា ២០២២ ។ រូបភាព៖ SCMP

លោកវិទូ | ថ្ងៃ ១᧵១២ ឆ្នាំខាល ចត្វាស័ក ព.ស. ២៥៦៦ | ១៣ វិច្ឆិកា ២០២២ 

ព្រះវិហារមួយត្រូវបានភ្លើងឆាបឆេះដោយចៃដន្យ ក្នុងពិធីបុណ្យបង្ហោះចង្កៀងគោម នៅភាគខាងជើងប្រទេសថៃ នេះបើយោងតាមសេចក្តីរាយការណ៍ពីប្រព័ន្ធផ្សព្វផ្សាយ ។ ពិធីបុណ្យបង្ហោះចង្កៀងគោមដ៏ពេញនិយមនេះ បានធ្វើឲ្យមានការព្រួយបារម្ភ អំពីសុវត្ថិភាពរួចមកហើយនាពេលកន្លងមក ។

នៅក្នុងពិធីបុណ្យបង្ហោះចង្កៀងគោមយីប៉េង ក្នុងខេត្តឈៀងម៉ៃ ដែលទាក់ទាញភ្ញៀវទេសចររាប់ពាន់នាក់ ចង្កៀងគោមត្រូវបានដុតបំភ្លឺ និងបង្ហោះទៅលើមេឃពេលយប់ នេះបើយោងតាម ​​Thaiger ដែលជាគេហទំព័រព័ត៌មានភាសាអង់គ្លេសរបស់ប្រទេសថៃ ។

ពីដើម ព្រឹត្តិការណ៍​នេះ​ក៏​ត្រូវ​បាន​ប្រារព្ធ​នៅ​តំបន់​ផ្សេង​ទៀត​នៃ​ប្រទេស​ថៃ​ ដែល​មាន​អាយុកាល​រាប់រយ​ឆ្នាំ​មក​ហើយ ​ត្រូវ​បាន​ប្រារព្ធ​ឡើង​ ​ដើម្បី​ប្រារព្ធ​ការ​បញ្ចប់​រដូវ​មូសុង (ត្រូវនឹងថ្ងៃបុណ្យអកអំបុក បណ្ដែតប្រទីប និងសំពះព្រះខែ នៅប្រទេសកម្ពុជា) ។

យោងតាមសារព័ត៌មាន Thaiger បានឲ្យដឹងថា ពិធីបុណ្យឆ្នាំនេះ ដែលប្រារព្ធឡើងនៅថ្ងៃទ៨ ខែវិច្ឆិកា ត្រូវបានរំខាន នៅពេលដែលចង្កៀងអណ្តែតមួយបានធ្លាក់ទៅលើកំពូលព្រះវិហារផ្លាស្ទិច ដែលបណ្តាលឲ្យឆាបឆេះយ៉ាងសន្ធោសន្ធៅ នៅផ្នែកខាងលើរតែម្តង ។

នៅក្នុងវីដេអូឃ្លីបមួយដែលត្រូវបានបង្ហោះដោយសារព័ត៌មាន South China Morning Post គេអាចមើលឃើញព្រះវិហារបានឆាបឆេះដោយអណ្តាតភ្លើង និងផ្សែងខ្មៅទៅលើអាកាស ។ 

A Buddhist pagoda was set alight by a falling sky lantern during a religious festival in Thailand. pic.twitter.com/U4xPlGsON8

— South China Morning Post (@SCMPNews) November 10, 2022

យោងតាមប្រភពពីកន្លែងកើតហេតុ បានឲ្យដឹងថា មិនមាននរណាម្នាក់រងរបួសនោះទេ ហើយអគ្គិភ័យត្រូវបានពន្លត់ភ្លាមៗ ។ 

ប្រជាពលរដ្ឋម្នាក់​បាន​បញ្ចេញ​មតិ​ថា ចង្កៀង​គោម​នេះ «​គ្រោះថ្នាក់​សម្រាប់​ផ្ទះសម្បែង យន្តហោះ និង​បរិស្ថាន​» ​។

យោងតាមសារព័ត៌មាន Nikkei Asia បានឲ្យដឹងថា កាលពីប៉ុន្មានឆ្នាំមុន ចង្កៀងគោមបានឆេះផ្ទះជាច្រើនខ្នងគ្មានសល់ និងខូចខាតដល់បណ្តាញអគ្គិសនី ។

ជើងហោះហើរក៏ត្រូវបានលុបចោល ឬកំណត់ពេលឡើងវិញផងដែរ ដោយសារតែមានការព្រួយបារម្ភអំពីការរំខានផ្លូវហោះហើរ នេះបើយោងតាមការចេញផ្សាយពីគេហទំព័សារព័ត៌មានខាងលើនេះ ។

យោងតាមកាសែត The Guardian បានឲ្យដឹងផងដែរថា នៅមុនពិធីបុណ្យបង្ហោះគោមស្រដៀងគ្នានេះ នៅក្នុងឆ្នាំ២០១៤ អាជ្ញាធរថៃបានគំរាមកំហែងអ្នកទៅពិធីបុណ្យ ដោយទោសប្រហារជីវិត ប្រសិនបើពួកគេបង្ហោះចង្កៀងគោមនៅជិតអាកាសយានដ្ឋានពេក ៕

© រក្សាសិទ្ធិដោយលោកវិទូ