លោកវិទូ | ថ្ងៃ ៧᧧៨ ឆ្នាំថោះ បញ្ចស័ក ព.ស. ២៥៦៧ | ២៤ មិថុនា ២០២៣
ពីបណ្ឌិតទៅអចិត្តជន
(បទកាកគតិ)
១. ចាស់គិតសម្គាល់ ឫកគោក្នុងក្រោល រដូវរំហើយ
កញ្ជ្រាំងសល់គុម្ព រៃយំឆ្លងឆ្លើយ គង្វាលលែងហើយ
វាលោតកញ្ឆេង ។
២. បោលកាត់ភូមិស្រុក បោះពួយទៅមុខ ដីហុយបែកផ្សែង
សំដៅវាលស្រែ ញីញ៉ែខែងរ៉ែង បង្អួតសម្ដែង
ប្ដូរឫកពាថ្មី ។
៣. ឯអ្នកអន្ទិត ធ្លាប់រស់រួមរឹត ដោយធម៌វិន័យ
ខ្លះសឹកភ្លាមភ្លែត ពាល់ហេតុលោកីយ៍ ភ្លេចអស់និស្ស័យ
ធ្លាប់ជាបព្វជិត ។
៤. ត្រេកត្រអាលខ្លាំង លោភៈមោហ៍បាំង គប់ពាលទុច្ចរិត
បាត់សច្ចធម៌ លម្អបណ្ឌិត ធម៌ឲ្យញាតិមិត្ត
អន្ទិតយកលាភ ។
៥. បើប្រែយ៉ាងនេះ ទោះមានចំណេះ បណ្ឌិតមិនទាប
ក៏គង់អស់លក្ខណ៍ អស់អ្នកយល់ជ្រាប ធ្លាក់ក្នុងសភាព
អចិត្តជន ៕ © រក្សាសិទ្ធិដោយលោកវិទូ
លោកវិទូចុះផ្សាយព័ត៌មានអនឡាញ អំពីព្រះពុទ្ធសាសនាខ្មែរ និងព្រះពុទ្ធសាសនាអន្តរជាតិថ្មីៗ ដើម្បីជាប្រយោជន៍ដល់ប្រិយមិត្តអ្នកអាន និងជាពន្លឺក្នុងការត្រិះរិះពិចារណា ក្នុងការប្រព្រឹត្តទៅ នៃព្រះពុទ្ធសាសនាក្នុងសង្គម ។
No comments:
Post a Comment