 |
| ឯកអគ្គរដ្ឋទូត មន្ត្រីទូតឥណ្ឌា និងសមណនិស្សិត-និស្សិតខ្មែរ, ភ្នំពេញ ២៧ កក្កដា ២០២៣ ។ រូបភាព៖ ហ្វេសប៊ុក |
លោកវិទូ | ថ្ងៃ ៣᧷៩ ឆ្នាំថោះ បញ្ចស័ក ព.ស. ២៥៦៧ | ៨ សីហា ២០២៣
សមណនិស្សិត-និស្សិតកម្ពុជាចំនួន ៤០ រូប បានទទួលអាហារូបករណ៍ នៃរដ្ឋាភិបាលឥណ្ឌា តាមរយៈក្រុមប្រឹក្សាឥណ្ឌាដើម្បីទំនាក់ទំនងវប្បធម៌ (ICCR) សម្រាប់កម្មវិធីថ្នាក់បរិញ្ញាបត្រ បរិញ្ញាបត្រ និងបណ្ឌិត នៅសាកលវិទ្យាល័យឥណ្ឌាល្បីៗ សម្រាប់ឆ្នាំសិក្សា២០២៣-២០២៤ ។ នៅក្នុងនោះ យ៉ាងហោចណាស់មានព្រះសង្ឃសមណនិស្សិតចំនួន ៥ រូបក៏បានទទួលអាហារូបករណ៍ផងដែរ សម្រាប់ឆ្នាំសិក្សាថ្មីនេះ ។
នៅថ្ងៃទី ២៧ ខែកក្កដា ឆ្នាំ២០២៣ លោកជំទាវបណ្ឌិត ទេវ្យានី ខូប្រាហ្កាដេ ឯកអគ្គរដ្ឋទូតឥណ្ឌាប្រចាំព្រះរាជាណាចក្រកម្ពុជា បានទទួលស្វាគមន៍សមណនិស្សិត-និស្សតទាំង ៤០ រូប នៅស្ថានទូតឥណ្ឌា ។
យោងតាមសេចក្តីប្រកាសរបស់ស្ថានទូតឥណ្ឌា បានឲ្យដឹងថា ឯកអគ្គរដ្ឋទូតនៅក្នុងសុន្ទរកថារបស់ជំទាវបានលើកឡើងថា ការសិក្សានៅប្រទេសឥណ្ឌាគឺជាមធ្យោបាយដ៏ល្អប្រសើរមួយដើម្បីពង្រីកចំណេះដឹង មើលឃើញពិភពលោក កែលម្អសមត្ថភាពអន្តរវប្បធម៌ និងទទួលបានបទពិសោធន៍ដ៏មានតម្លៃ ។
លោកស្រីក៏បានបញ្ជាក់ដែរថា ទំនាក់ទំនងវប្បធម៌ និងប្រវត្តិសាស្ត្រកម្ពុជា-ឥណ្ឌា មានអាយុកាលជាងមួយសហសវត្សមកហើយ នៅពេលវប្បធម៌ សាសនា និងពាណិជ្ជកម្មរបស់ឥណ្ឌាបានសាយភាយចេញពីប្រទេសឥណ្ឌា ហើយបានសាយភាយយ៉ាងឆាប់រហ័ស នៅក្នុងផ្នែកផ្សេងៗនៃអាស៊ីអាគ្នេយ៍ ។ លោកជំទាវឯកអគ្គរដ្ឋទូតបានបន្ថែមថា សិស្សានុសិស្សទាំងអស់នឹងទាក់ទងនឹងភាសា វប្បធម៌ ជាដើម ប្រាកដជាទទួលបានបទពិសោធន៍ស្រដៀងគ្នារវាងប្រទេសទាំងពីរ ។
ក្នុងឱកាសនោះ វគ្គវិធីផ្សាយផ្ទាល់ និងវីដេអូឃ្លីបខ្លីចំនួនបីរបស់និស្សិតកម្ពុជាដែលកំពុងសិក្សានៅប្រទេសឥណ្ឌា ត្រូវបានបង្ហាញសម្រាប់ការចែករំលែកបទពិសោធន៍របស់ពួកគេ សម្រាប់អ្នកសិក្សាថ្មី អមដោយវគ្គសំណួរ-ចម្លើយនៅចុងបញ្ចប់ ។
យោងតាមសេចក្តីប្រកាសព័ត៌មានរបស់ស្ថានទូត ឥណ្ឌាមានរចនាសម្ព័ន្ធទំនើបបំផុតមួយសម្រាប់ការអប់រំឧត្តមសិក្សា ។ សញ្ញាបត្រពីឥណ្ឌាត្រូវបានទទួលស្គាល់នៅទូទាំងពិភពលោក ហើយអ្នកជំនាញដែលបានសិក្សាកម្រិតខ្ពស់នៅក្នុងប្រទេសឥណ្ឌាបានចូលរួមចំណែកយ៉ាងសំខាន់ ចំពោះការស្រាវជ្រាវកម្រិតខ្ពស់ និងអនុវត្តនៅក្នុងមុខវិជ្ជាផ្សេងៗគ្នាទូទាំងពិភពលោក ។ វិទ្យាស្ថានឥណ្ឌាមួយចំនួនសម្រាប់ការសិក្សាថ្នាក់ឧត្តមសិក្សាបានក្លាយជានិមិត្តរូបនៃឧត្តមភាពសិក្សា ក្នុងរយៈពេលប៉ុន្មានឆ្នាំនេះ ។
ស្ថានទូតឥណ្ឌាប្រចាំទីក្រុងភ្នំពេញ បន្តខិតខំលើកទឹកចិត្តសិស្សានុសិស្សកាន់តែច្រើនឡើង ដើម្បីស្វែងរកឱកាសសិក្សាថ្នាក់ឧត្តមសិក្សានៅប្រទេសឥណ្ឌា ។
បន្ទាប់ពីអនុប្រធានាធិបតីនៃប្រទេសឥណ្ឌាបានមកបំពេញទស្សនកិច្ចនៅកម្ពុជា ដើម្បីចូលរួមកិច្ចប្រជុំកំពូលអាស៊ាន-ឥណ្ឌា ដែលធ្វើឡើងនៅទីក្រុងភ្នំពេញ ក្នុងខែវិច្ឆិកា ឆ្នាំ២០២២ រដ្ឋាភិបាលឥណ្ឌាបានប្រកាសបង្កើនចំនួនអាហារូបករណ៍ ពី ៣០ ទៅ ៥០ អាហារូករណ៍ សម្រាប់សមណនិស្សិត-និស្សិតកម្ពុជា ចាប់ពីឆ្នាំសិក្សា២០២៣-២០២៤តទៅ ៕
© រក្សាសិទ្ធិដោយលោកវិទូ
លោកវិទូចុះផ្សាយព័ត៌មានអនឡាញ អំពីព្រះពុទ្ធសាសនាខ្មែរ និងព្រះពុទ្ធសាសនាអន្តរជាតិថ្មីៗ ដើម្បីជាប្រយោជន៍ដល់ប្រិយមិត្តអ្នកអាន និងជាពន្លឺក្នុងការត្រិះរិះពិចារណា ក្នុងការប្រព្រឹត្តទៅ នៃព្រះពុទ្ធសាសនាក្នុងសង្គម ។
No comments:
Post a Comment